Cooperatiounspolitik*

Musse wéinst der méi grousser Zuel u Flüchtlingen déi an Europa kommen méi Suen an d’Kooperatioun fléissen?

– Kënne mer duerch eng intelligent Kooperatiounspolitik manner Migratioun kréien? Ech mengen, dat klappt kaum. Nach bis d’lescht Joer sinn déi meescht Demandeurs de protection internationale aus de Balkanlänner komm. Sécher ass de Kosovo e Land, wou et schwiereg ass ze liewen, mä et gehéiert net zu den äermste Länner vun der Welt an et ass och eigentlech keen typescht Zilland fir Kooperatioun. Et ass jo esou, datt déi meescht Demanden fir Asyl aus deem Land komm sinn. Wann een awer kuckt, wéi d’Unerkennung war, da gëtt dat schonn en anert Bild. Haut kommen déi meescht Flüchtlingen aus Syrien, dem Irak; wierklech och keng typesch Zillänner fir Kooperatioun. An do ass am Moment och guer net, leider guer net u Kooperatiounsstrukturen ze denken.

Éischte Constat also: D’Zillänner vun der Kooperatiounspolitik sinn net onbedéngt identesch mat deene Länner, wou déi meeschte Migranten hierkommen.

Déi Migranten, déi haut bei eis ukommen, sinn zu engem groussen Deel aus enger Mëttelschicht oder aus besser situéierte Milieuen. Och wa mer d’Gefill hunn, datt ganz vill Leit ënnerwee wiere bei eis, wësse mer, datt ganz vill Leit sech de Wee bis heihinner guer net leeschte kënnen. All mënschlech Katastrophen an der Vergaangenheet hu gewisen, datt et déi Leit sinn, déi sech eng Flucht emol fir d’Éischt finanziell konnte leeschten, déi déi gréissten Iwwerliewenschancen haten. Déi Äermst vun deenen Aarmen hu kaum d’Moyenen, fir ze flüchten, a scho guer net bis an Europa.

Zweete Constat also: D’Zilpopulatioun vun der Kooperatiounspolitik, déi Äermst vun deenen Aarmen, ass net direkt identesch mam Gros vun de Flüchtlingen, déi an Europa kommen.

Jo, an da gëtt et besonnesch an Afrika de Phenomeen vun de Communautéiten, déi all Suen zesummekrazen an hire beschte jonke Mann op de Wee an de Weste schécken. Wann deen dann a sengem Zilland ukënnt, da laascht op him den Drock, fir alles, wat seng Communautéit an hien investéiert huet, och erëm zréckzeginn. An do wier et wichteg fir Europa a fir déi betraffe Leit, wa mer eng Dier géifen opmaache fir eng legal Migratioun an Europa.

Mäin drëtte Constat: Jo, mir kéinten d’Flüchtlingskris e bëssen entschäerfen, wa mer an Europa legal Méiglechkeete fir Mënschen, déi net politesch verfollegt sinn, géife schafen, fir an Europa anzereesen an ze schaffen.

 

Wéi wäert d’Kooperatiounspolitik an der Zukunft ausgesinn?

Mir wëssen alleguer, datt d’Chancen net grouss sinn, datt d’Situatioun an de Krichsgebidder sech schnell wäert verbesseren. An eigentlech wësse mer och all, datt eng nei Well vu Flüchtlinge bevirsteet, wa mer et net dréngend fäerdegbréngen, Fortschrëtter an der Klimapolitik ze erreechen. Zwee Grad Äerderwäermung, dat schaaft scho ganz vill Problemer. Mä wa mer emol net dat Zil géifen erreechen, da géife ganz Stied a Géigenden, wou haut nach Millioune Leit wunnen, ganz einfach onbewunnbar ginn.

Duerfir ass et och fir eis ganz wichteg, datt eis Regierung de Wee zu méi Klimaschutz konsequent weidergeet, déi nei Weeër a positiv Auswierkungen op d’Wirtschaft an d’Aarbechtsplazen an d’Fënster stellt an déi Chancen, déi sech doraus erginn, och notzt.

Kooperatiounspolitik bedreiwe mir net als Selbstzweck. D’Hëllef sollt ëmmer hannerfrot ginn, a mir musse kontrolléieren, fir dass eis Suen sou gutt wéi méiglech agesat ginn; Lëtzebuerg huet eng gutt Renommée. Mir hunn an deene leschten 30 Joer vill geléiert, an zesumme mat eisen ONGen wäerte mir och weider bäiléieren. Mir hunn e gesond Verhältnis tëscht multilateraler a bilateraler Hëllef geschaf, an als räicht Land sollte mir eis weider engagéieren. An Zukunft wäerte mir probéieren, eis nach méi wéi bis elo ob déi äermst Länner ze fokusséieren well eng Rei sougenannte Schwellelänner mëttlerweil an der Positioun si, fir selwer méi fir hier benodeelegt Regiounen a Populatiounen ze maachen.

Wat fir eng Bedeitung hunn déi nei global Ziler vun der UN?

Poster realiséiert vun de Schoulkanner vun der Angsber Schoul

Poster realiséiert vun de Schoulkanner vun der Angsber Schoul

Déi al Millennium Ziler vun der UN goufen am September duerch déi nei Nohalteg Entwécklungs Ziler ersat. D’Millenniumsziler goufen zwar net all erreecht, mee et huet sech awer villes positiv verännert: et gëtt Fortschrëtter bei der Bekämpfung vun der Kannerstierflechkeet, bei der Reduzéierung vun der extremer Aarmut a bei der Aschoulung. Déi nei Objektiver markéieren allerdéngs e wichtege Paradigmewiessel: si si vill méi breed opgestallt a betreffen net méi just déi sougenannten Entwécklungslänner, mee all d’Länner, also och d’Industrielänner. An si verknäppen de Kampf géint Aarmut an Ongläichheet z.B. och mam Klimaschutz.

Ass fairen Handel eng Méiglechkeet fir eppes géint d’Ausbeutung vun de Leit ze maachen?

Jo! Produiten aus fairem Handel ze kafen, ass fir eis vläicht just e klenge Geste, mee et ass awer ee Geste dee jidderee ka maachen, an deen d’Produzenten schützt an ënnerstëtzt.

Wou mer kënnen, solle mer op regional a lokal Produiten a wa méiglech op Produiten aus der biologescher Landwirtschaft zréckgräifen. Dat geet bei Kaffi, Kakao, Banannen… net, an do solle mer eis da beméien, déi Produite mam Label vu Fairtrade ze huelen.

Mir huelen nach ëmmer a Kaf, datt a villen Deeler vun der Welt d’Ausbeutung vun de Leit mat ëffentleche Gelder finanzéiert gëtt. Et ka jo keng Fro vum Präis sinn, wann an ëffentleche Verwaltungen an op Gemengen nach ëmmer Kaffismaschinne stinn, wou de Kilospräis vun de Kaffiskapselen tëschent 80 an 90 Euro läit, ganz ofgesi vun der ökologescher Bilanz vun der Verpackung.

Eis Administratioune kennen a mussen hei mam gudde Beispill virgoen, an an deem Sënn begréissen ech et, dass d’Chamber sech och lues awer sécher op fair Liewensmëttel ëmstellt.

*Interview duerch déi gréng
Dieser Beitrag wurde unter Politik veröffentlicht. Setze ein Lesezeichen auf den Permalink.

Kommentar verfassen

Trage deine Daten unten ein oder klicke ein Icon um dich einzuloggen:

WordPress.com-Logo

Du kommentierst mit Deinem WordPress.com-Konto. Abmelden / Ändern )

Twitter-Bild

Du kommentierst mit Deinem Twitter-Konto. Abmelden / Ändern )

Facebook-Foto

Du kommentierst mit Deinem Facebook-Konto. Abmelden / Ändern )

Google+ Foto

Du kommentierst mit Deinem Google+-Konto. Abmelden / Ändern )

Verbinde mit %s